«Díes claros estos últimos d'avientu, de cielos espeyaos y fríos. Los pomares, qu'hai nada yeren too esplendor cargaos de fruta, tán agora coles cañes desnudes como pidiendo clemencia al dios ciegu de la xelada. Hai, con too y con eso, rellumos d'esperanza. Pasáu el rigor del iviernu, nesti quiciabes antepar d'un rigor más bravu, podemos esfrutar de la lluz fría, d'un cielu azul que s'estiende, ensín una nube, sobre la isla desierta qu'habita dalquién que gasta'l nuesu nome y los nuesos apellíos. Nun ta mal despidise del añu con esti cielu, con esta lluz: anque mañana se vuelva a meter n'agua, que volverá, too nos recuerda que foi posible otru añu, otra perspectiva de ser.
Los díes claros dan pa pensar: somos, seremos. Ehí, a la vuelta de la esquina, enfilando pel degoladoriu del tiempu, ta un añu nuevu: 2009. Dica poco lo vivio será alcordanza, premonición d'un presente que, de momentu, escapa. Otru añu más, otra raya nel mangu escuru de la memoria. Los pomares, cargaos agora de tiempu, siguen afuracando colos sos raigaños la tierra xelao. La humilde pebida de trigu durme un tranquilu sueñu. Too volverá a biltar, too volverá a remanecer: vendrán díes y selmanes, estacines, taxis, llamaes por teléfonu. La vida seguirá siendo un misteriu»

(Xuan Bello, «Díes claros» de su columna Ríu arriba, Les noticies)

... y qué ganas de que tengas razón, Xuan...